चैत ३ पर्वत । गत जेठ ३१ गतेको पहिरोले परिवार र घरवास गुमाएका परिवारलाई नयाँ घर बनाउन सहयोग गर्ने क्रममा पर्वत वेलफेयर सोसाईटी यूकेको दोस्रो किस्ताको आर्थिक सहयोग हस्तान्तरण गरिएको छ । पहिरोले उठिवास भएका अम्मर थापा र गणेश विकको घर बनाउन पर्वत वेलफेयर सोसाईटी यूके मार्फत प्राप्त दुई लाख मध्ये अमरलाई एक लाख र गणेश लाई एक लाख रुपैयाँ हस्तान्तरण गरिएको हो । पर्वत वेलफेयर सोसाईटी यूकेले अन्तराष्ट्रिय पर्वत समाजको समन्वयमा पहिरो पीडितको पुनस्र्थापनामा सहयोग गर्ने अभियान चलाएको छ । 

पहिरो पीडितको घर बनाउन यूकेबाट प्राप्त रकम कुश्मा नगरपालिकाका नगरप्रमुख रामचन्द्र जोशीले हस्तान्तरण गर्नुभयो । तीन महिना अगाडी पहिलो किस्ताको रकम पनि जोशी मार्फत हस्तान्तरण गरिएको थियो । नगरप्रमुख जोशीले रकम हस्तान्तरण गर्दै प्रवासी नेपालीहरुको यो सहयोगले पहिरो पीडितलाई राहात मिलेको बताउनुभयो । उहाँले प्राप्त सहयोगका कारण पीडितको घर चाँडै बनेर सुरक्षित घर प्राप्त हुने क्रममा रहेको अवगत गराउनुभयो । पीडित गणेश विक र अमर थापाले घर निर्माणको काम अन्तिम चरणमा पु¥याएका छन् ।

पहिरो गएलगतै पर्वत वेलफेयर सोसाईटीका संरक्षक हितकाजी गुरुङले पीडितको समस्या बुझेर पुनस्र्थापनाका लागि सहयोग गर्ने बाचा गर्नुभएको थियो । दुर्लुङ घर भई हाल यूकेमा रहनुभएका गुरुङको सल्लाहमा पर्वत वेलफेयर सोसाईटीले दुर्लुङ पहिरो पीडितलाई घर पुननिर्माणमा सहयोग गर्ने योजना बनेको थियो । 

उहाँले आफुहरुले गाउँको दुखमा समाहित भएर थोरै भएपनि राहात दिलाएको बताउनुभएको छ । पर्वत वेलफेयर सोसाईटी यूकेका अध्यक्ष नेत्र आलेले आफ्नो संस्थाले पीडित व्याक्तिहरुको उत्थान गर्दै आएको बताउनुभयो । उहाँले दुर्लुङका पहिरो पीडितको पुनस्थार्पनामा गरिएको सहयोगले आत्मासन्तुष्टि मिलेको बताउनुभयो । 

दुर्लुङमा पहिरोका कारण दुई परिवारको ९ जनाको मृत्यु भएको थियो भने घरगोठ, पशुचौपाय सबै सखाप भएका थिए । प्रवासी नेपाली र देशका विभिन्न संघसंस्था र व्याक्तिहरुले पीडितलाई राहात र पुनस्र्थापनामा सहयोग गर्दै आएका छन् ।