Author
समीर रेग्मी
समीर रेग्मी

Contributor, ParbatNepal

2 months ago

134




पर्वत म छिट्टै नै आउनेछु
loading...
पर्वत म छिट्टै नै आउनेछु


धेरै समय भएको नै छैन नी

तिमिदेखि टाढिएको म

तिमी यति छिट्टै न आत्तिनु है

यी धेरै गन्तव्यहरु बीचमा म

तिमी तिर आउने बाटो भेटाउनेछु

पर्वत , म छिट्टै नै आउनेछु !!


अन्नपूर्ण हिमशृङ्खला अनि ती

अनगिन्ती पहाडहरुको कुनाबाट

सूर्योदयको दृश्य नदेखेको धेरै भयो

तर मोदी खोलाको छेउछाउ हुँदै म

नयापूलबाट तिमीलाई बोलाउनेछु

पर्वत , म छिट्टै नै आउनेछु !!


हिमपात हुँदै छ रे आजकल

जलजला, र मोदीका पहाडहरूमा

तिम्रो काखमा चिसो हिउँ खेल्ने रहर

पूरा गर्न एकदिन म पनि

हम्पालको हिउँमा रमाउनेछु 

पर्वत , म छिट्टै नै आउनेछु !!


हे निश्चल बगिरहने गण्डकी 

तिम्रो त्यो कलकल आवाजले 

सायद मलाई नै खोजिरहेको छ

तिम्रो वेग मै सवार भई म आफूलाई

उत्तर पर्वत बाट दक्षिण पुर्याउनेछु 

पर्वत , म छिट्टै नै आउनेछु !!


तिम्रो दक्षिण भेगमा पनि म

एकदिन अवश्य नै पुग्नेछु

पन्चासे , डहरे लेक हुँदै

महाशिला , पदयात्रामा रमाएर म

तिम्रो मायाको प्यास मेटाउनेछु

पर्वत , म छिट्टै नै आउनेछु !!


सधैं सपनीमा आएर मेरो 

तिमी सताउने नगर न मलाई

तिम्रै माटो र मायाबाट बनेको म

आफ्नो हृदयमा सधैं भरी

तिमीलाई नै बसाउनेछु

पर्वत , म छिट्टै नै आउनेछु !!


अरूले जसरी तिम्रो माया

कहाँ भुलाउन सक्छु र म ? 

इन्द्रेणीका रंगहरु मागी एकदिन

बेसहारा भइरहेकी तिमीलाई म

सुन्दर स्वर्गझै सजाउनेछु

पर्वत , म छिट्टै नै आउनेछु !!

NA