बैशाख २७, पर्वत । पर्वतको जलजला गाउँपालिका ७ बाँस्कोटको ठूलो उव्जाउ भूमी सिँचाईको अभावमा बाँझो रहेको छ । वास्कोटमा सिँचाईको आवश्यकता रहेको स्थानीयले बताएका छन् ।

करिब २ हजार हेक्टर क्षेत्रफलमा फैलिएको फाँटमा तीन खेती गर्न सकिने भएपनि किसानहरु पानीको अभावमा बाँझो राख्ने गरेका छन् । केहि किसानहरुले पाईप मार्फत ल्याइएको पानी प्रयोग गरेर तरकारी खेती गर्दै आएका छन् । यहाँ सिँचाईको सुविधा भएमा पर्वत जिल्लालाई नै तरकारीमा आत्मानिर्भर बनाउन सक्ने स्थानीय किसान दयालु गिरीले बताउनुभयो ।

सिँचाईको सुविधा माग्दै स्थानीयले संघीय साँसद देखि कृषि ज्ञान केन्द्र र सिँचाई कार्यालयमा किसानहरु पटक पटक माग लिएर पुगेको बताए । अहिले सिँचाई डिभिजन कार्यालयले सिँचाईका लागि सर्भे गरेको बताईएको छ । तर सिँचाईको योजना अगाडी नबढ्दा किसानहरु आशाबादी हुन सकेका छैनन ।

स्थानीय सागर गिरी, बिनोद गिरीले कृषि ज्ञान केन्द्रले दिएको साना सिँचाई योजना बाट तरकारी खेती गर्दै आएका छन् । उब्जाउ भूमी भएपनि पानीकै असुविधाले प्राय खेत बाँझो हुने गरेको किसान सागरले बताउनुभयो । धाईरिङ जिल्लाकै सबैभन्दा बढि तरकारी खेतीका लागि पकेट क्षेत्र मानिन्छ । उत्पादन गरेको तरकारी बजारीकरणमा समस्या नहुने किसानहरु बताउँछन् ।