कार्तिक १८ पर्वत । पार्वतीको जन्मथलो र कालञ्जर पर्वतको नामले चर्चित पर्वत जिल्लामा हरेक वर्ष धार्मिक महोत्सव हुने भएको छ । ईश्वर कृष्ण महाराजले पर्वतमा हरेक बर्ष धार्मिक महोत्सव आयोजना गर्नुहुने भएको हो । धार्मिक महोत्सव मार्फत पर्वतलाई धार्मिक पर्यटकिय क्षेत्र बनाउने संकल्प अनुसार महोत्सव आयोजना गरिने भएको हो । हरेक नयाँ बर्षको बैशाख १ गते देखि ११ गते सम्म महोत्सव आयोजना हुने भएको हो । शनिबार सदरमुकाम कुश्मामा भएको भेलाले महोत्सव आयोजना गर्न मुल आयोजक समिति गठन गरेको छ । आगामी २०७६ साल बैशाख १ गते देखि ११ गते सम्म पहिलो महोत्सव आयोजना गर्न पृथ्वीनारायण शर्माको संयोजकत्वमा ३७ सदस्सिय मुल आयोजक समिति गठन भएको हो । १५१ सदस्सिय संस्थापक समिति पनि बनेको छ ।

गुप्तेश्वर गुफालाई आधार बनाएर धार्मिक महोत्सव गर्न लागिएको हो । पार्वती जन्मेको स्थान पर्बत भएको धार्मिक विश्वास अनुसार ५१ फिट अग्लो शिव पार्वतीको मुर्ती निमार्ण गर्ने योजना रहेको छ । मुर्ती गुप्तेश्वर गुफाको परिसरमा राखिने छ । १ सय ५१ जना संस्थापक सदस्य बनाई १÷१ लाख सस्थापन सदस्यको तर्फबाट रकम संकलन गरिने भएको छ । कुल १ करोड ५१ लाख मुर्ती निर्माणमा खर्च हुने अनुमान छ । ईश्वर कृष्ण महाराजले सिस महल, धर्मशाला र कोटिहोम निर्माण गर्ने योजना समेत रहेको बताउनुभयो । भेलाकै अवसरमा शनिवार एकैदिन २६ लाख रुपैयाँ संकलन भएको छ । उक्त रकम मुर्ती निर्माणमा लगानी गरिने भएको छ ।

पर्वतको धार्मिक प्रचारप्रसार गर्न सके यहाँ पर्याप्त मात्रामा आन्तरीक तथा वाह्य धार्मिक भक्तजनहरु भित्रिने अपेक्षा गरिएको मुल आयोजक समितिका संयोजक पृथ्वीनारायण शर्माले बताउनुभयो । आईतवारबाटै कुश्मामा सचिवालय बनाएर प्रचारको काम शुरु हुने शर्माले बताउनुभएको छ । गुप्तेश्वर गुफालाई केन्द्रमा राखेर महोत्सव आयोजना गरिएपछि जिल्लाको मोदीबेनी, सहस्रधारा, शालिग्राम शिला, दुर्लुङकोट। पैयुँकोट , अलपेश्वर गुफा, पार्वती गुफा, लालेश्वर गुफा , पञ्चासे जस्ता धार्मिक स्थललाई पनि समान महत्व दिएर प्रचार गरिने आयोजकले जनाएको छ ।