पुष १० पर्वत ।  सडक फराकिलो र स्तरउन्नतीका लागि मध्यपहाडी लोकमार्गको पर्वत खण्ड पौष १२ गते बिहीबार देखि दैनिक ६ घण्टा बन्द हुने भएको छ । सडक बिस्तारका लागि पर्वतको सिमाना अँधेरीखोला देखि डिमुवाबजार सम्म दैनिक ६ घण्टा घण्टा गर्ने निर्णय भएको हो ।

जिल्ला प्रशासन कार्यालय पर्वतको संयोजनमा हिजो बसेको बैठकले बिहान १० बजे देखि साँझ ४ बजे सम्म सडक बन्द गर्ने निर्णय भएको हो । लोकमार्गको पर्वत खण्डमा पर्ने डिमुवा देखि बेतनी बिचको माहुरी भिरमा सडक फराकिलो बनाउने काम गर्न सडक बन्द गर्न लागिएको मध्य पहाडी सडक आयोजनाले जनाएको छ । पर्वतको डिमुवा र नयाँपुलको बिचमा रहेको महभीरमा सडक फराकिलो बनाउन पहरा कटान गर्न दैनिक छ घण्टा सडक बन्द गर्ने निर्णय भएको आयोजना प्रमुख आशिष थापा मगरले बताउनुभयो ।

बैठकमा सरोकारवालाहरुले सडक निर्माण कार्यप्रभावित नहुने र यात्रुलाई समेत सास्ती नहुने गरि निर्माण अगाडी बढाउन सुझाब दिएका छन । आयोजनाको पर्वतको प्रवेशद्वार देखि मालढुंगा सम्मको २३ दशमलब ७६९ किलोमिटर स्तरउन्नतीको काम लामा कन्ट्रक्सन प्रालिले जिम्मा लिएको छ । कम्पनीले ८३ करोड ९८ लाख रुपैयामा पर्वत खण्ड स्तरउन्नतीको कामको ठेक्का लिएको छ । अहिले सम्म ३० प्रतिशत काम सकिएको म्यानेजर गोबिन्दप्रसाद भुसालले जानकारी दिनुभयो ।

अहिले सबै ठाउँबाट काम शुरु गरिएको र दशै तिहारपछि कामलाई अझै तीब्र बनाउने काम भैरहेको निर्माण कम्पनीले जनाएको छ । आगामी असार सम्ममा ९० प्रतिशत काम सक्ने लक्ष्य सहित काम गरिरहेको बताउँदै उहाँले कार्तिक र मंसिरमा काम केही सुस्त भएपनि कम्तीमा ८० प्रतिशत सक्ने योजनामा रहेको बताउनुभयो ।

मध्यपहाडी लोकमार्ग आयोजनाले ७२ किलोमिटर लामो पोखरा बागलुङ्ग खण्ड लाई नयाँ स्वरुपमा ढाल्ने गरि मर्मत सम्भार तीब्र पारिरहेको छ । लोकमार्ग पुरै नयाँ स्वरुपमा बिस्तार र स्तरोन्नती गर्न चारवटा प्याकेज बनाएर काम भैरहेको छ ।

मध्यपहाडी सडक आयोजनाले दिएको जानकारी अनुसार तीन वर्ष पोखरा–बागलुङ खण्डको धेरैजसो भाग पुरै नयाँ बन्नेछ । २०५० सालमा निर्माण सम्पन्न भएको सडकका् धेरै खण्ड भत्केर सवारी चलाउन कठिन हुँदै गएको थियो भने सवारी साधनको चाप बढेका कारण साँघुरो सडकमा ठाउँठाउँमा जाम समेत हुने गरेको थियो । साँघुरो सडक र ठाउँठाउँमा भासिँदा सवारी संचालनमा समेत जोखिम थियो ।