पुष १८ पर्वत-

पर्वतको वाँसखर्कमा उत्पादन भएको सुन्तला नेपालकै उत्कृष्ठ भएको छ । पोखरामा भएको देशभरिका सुन्तलाको परिक्षणमा पर्वतको सुन्तला उत्कृष्ठ ठहरिएको हो ।

जिल्लाको वाँसखर्कको सुन्तला देशभरिका सुन्तला भन्दा सबैभन्दा रसिलो र स्वादिलो रहेको कृषि प्राविधिकको ल्याव परिक्षणवाट पत्ता लागेको हो । कृषि विकास मन्त्रालय, क्षेत्रीय कृषि निर्देशनालय, पोष्ट हार्वेष्ट निर्देशनालय लगायतका निकायले संयुक्त रुपमा सुन्तलाको परिक्षण गरेका थिए ।

आईतवार गरिएको परिक्षणमा पर्वतको सुन्तला उत्कृष्ठ रहेको ठहर गरेको जिल्ला कृषि विकास कार्यालयका वरिष्ठ कृषि विकास अधिकृत वासुदेव रेग्मीले वताउनुभयो । पर्वत जिल्लामा अनय ठाउँको भन्दा वाँसखर्कको सुन्तला स्वादिलो देखिएको रेग्मीले वताउनुभयो । पर्वत, स्याङजा, कास्कि, म्याग्दी, वागलुङ, लमजुङ, तनहुँ, गोर्खा लगायतका जिल्लाका कृषकहरुका सुन्तलाको ल्याव परिक्षण गरिएको हो ।

उपयुक्त भू–वनोट, उत्तरी मोहडा फर्किएको पाटो, वगैँचा सुधार, प्रयाप्त मल र सिँचाईको व्यवस्थाका कारण वाँसखर्कको सुन्तला स्वादिलो हुने गरेको कृषि प्राविधिकहरुले वताएका छन् । वाँसखर्कको सुन्तलाको दानाको आकार पनि ठुलो हुने गरेको छ ।