पर्वत । पर्वतको कुश्मा नगरपालिका–७ खरेहा–अधिकारी फाँट झोलुङ्गे पुल निर्माण सम्पन्न भएको छ । निर्माण सम्पन्न भएको पुलमा सर्वसाधारणहरु हिँडडुल गर्न शुरु गरेका छन् । सदरमुकाम कुश्मालाई जिल्लाको ज्ञादी क्षेत्रसँग जोड्न मोदीखोलामा निर्माण गरिएको उक्त पुल १ सय २८ मिटर अग्लो र ३ सय ५९ मिटर लामो छ ।

मोदी र कालीगण्डकीमा निर्माण भएका अन्य पुल भन्दा यो पुल केही होचो छ । कुल १ करोड ९१ लाखको लागतमा पुल निर्माण सम्पन्न भएको हो । पुल सम्पन्न भएपनि हिँड्नका लागि निर्माण समितिले खुल्ला गरेको छैन । तर पुलको फिनिसिङ भने सबै सकिएको निर्माण समितिका अध्यक्ष नारायण अधिकारीले जानकारी दिनुभयो । अधिकारीले पुल केहिदिनमा निर्वाध आवाजजावतका लागि खुल्ला गर्न लागिएको बताउनुभयो ।

यो पुल प्रयोग गर्न थालेपछि खरेहाबाट ज्ञादी र बितलबका बासिन्दालाई सुबिधा पुग्ने छ । उनीहरुको पैदल दुरी एक घण्टाबाट घटेर १० मिनेटमा छोटिने छ भने उत्पादित कृषि उपजहरु कुस्माबजार सम्म पु¥याउन सहज हुने भएको छ ।

अग्ला पुलमा पर्यटकको घुईचो

पर्वत । नयाँबर्षको आगमन सँगै पर्वत जिल्लामा रहेका मुलुककै लामा र अग्ला झोलुङ्गे पुलमा घुम्न आउने आन्तरिक तथा बाह्य पर्यटकको घुईँचो लागेको छ । अग्ला पुलका बारेमा स्वदेश तथा विदेशमा प्रचारप्रसार हुँदै गएपछि पुल हेर्न आउने पर्यटकको संख्यामा बृद्धि भएको हो ।

चैत्रेदशै र नयाँ बर्ष एउटै समय परेकाले पनि पुल हेर्न आउनेको संख्यामा बृद्धि भएको छ । पर्यटकको पर्खाइमा रहेका मुलुककै अग्लो झोलुंगेपुलको पहिचान बोकेको कुश्मा–ज्ञाँदी झोलुंगेपुल, वडागाउँ–मुडिकुवा, खरेहा–अधिकारीफाँट, र कुश्मा–कैया पुल अवलोकनका लागि आउने पर्यटकहरुको दिन प्रतिदिन संख्या बढ्दै गइरहेको छ । पर्वत पर्यटन प्रवद्र्धन केन्द्रका अध्यक्ष शिव पौडेडका अनुसार दैनिक पुल अवलोकनका लागि दैनिक ५ सयदेखी ७ सयसम्म पर्यटक आउने गरेका छन् ।

पुल अवलोकनका लागि आउनेहरुलाई व्यवस्थित रुपमा अवलोकन, सहज रुपमा आवतजावत गर्न पुलका दुई छेउमा बगैचा तथा विश्रामस्थल समेत निर्माण गर्न थालिएको छ । रातिको समयमा आउनेलाई लक्ष्य गर्दै पुलका दुवै भागमा बत्तीको समेत व्यवस्था गरिएको छ । पुलमा दुवै क्षेत्रमा व्यवस्थित होटल तथा रेस्टुरेन्ट पनि सञ्चालनमा आएका छन् । पुलमा अन्य दिनको तुलनामा निकै भिड बढेको स्थानीय होटल व्यवसायी राम गौडेले बताउनु भयो ।

पछिल्लो समय विभिन्न विद्यालयको शैक्षिक भ्रमणको गन्तव्य समेत अग्ला पुल बन्ने गरेका छन् ।