रोशन तिवारी,पर्वत  । पर्वत, वागलुङ र म्याग्दी सदरमुकाम बाट उत्पादन हुने फोहोर र ढल कालीगण्डकी नदीमा मिसाउँदा दुर्गन्ध बढेको छ । कालीगण्डकी नदीमा वर्षौदेखि फोहोर फाल्ने गरिएको छ । नदीमा फोहोर मिसाउँदा धार्मिक दृष्टिले पवित्र र पर्यटकिय हिसावले महत्वपूर्ण मानिएको कालीगण्डकी नदीको अस्तित्व खतरामा पुगेको नागरिकहरुको गुनासो छ ।

पर्वतको कुश्मा नगरपालिकाले हालै ल्याण्डफिल्ड साईड बनाएर फोहोर फाल्न शुरु गरेको छ । तर, बागलुङ बजार, म्याग्दीको बेनी बजार, पर्वतको फलेवास नगरपालिका, मोदी गाउँपालिका र जलजला गाउँपालिकाको फोहोर भने अहिले पनि कालीगण्डकी नदीमै फाल्ने गरिएको छ । नगर तथा गाउँपालिकाहरुले फोहोर व्यवस्थापनमा कुनै ध्यान दिएका छैनन बागलुङ नगरपालिकाका नगरप्रमुख जनकराज पौडेलले फोहोर व्यवस्थित गर्ने ठाउँको खोजी भैरहेकाले अबको ६ महिनापछि नदीमा फोहोर फाल्न रोकिने बताउनुभयो ।

बजार क्षेत्रको फोहोर प्रसोधन गर्ने गरि ल्याण्डफिल्ड साईडको खोजी भैरहेको पौडेलले जानकारी दिनुभयो । म्याग्दीको बेनीका बासिन्दाहरुले कालीगण्डकी नदीमा फोहोर मिसाउन नहुने माग गर्दै आईरहेका छन् । तर नदी किनारमै नगरपालिकाले फोहोर फाल्दै आईरहेको छ । पर्वतको जलजला गाउँपालिकाका बजार क्षेत्रको फोहोर पनि कालीगण्डकीमा मिसाउने गरिएको छ ।

मोदी गाउँपालिकाको फोहोर मोदीखोलामा फालिन्छ । मोदी नदी कालीगण्डकीमा मिसिन्छ । मोदीबेनी क्षेत्र विकास समितिका अध्यक्ष केशवराज पौडेलले नदीमा फोहोर बढ्दा धार्मिक रुपमा पवित्र नदी कालीगण्डकीको अस्तित्व खतरामा परेको बताउनुभयो । धार्मिक अनुरागीहरुले कालीगण्डकी नदीमा स्नान गर्न समेत घिन मान्ने स्थिती आएको पौडेलले बताउनुभयो ।