Correspondent, ParbatNepal
6 years ago
3583
मंसिर १०, पर्वत । पर्वतको पाङबाट वागलुङको वाँगेचौर जोड्ने नेपालकै लामो सिंगल स्पान झोलुंगे पुलको काम ८० प्रतिशत सकिएको छ । २०७५ चैत महीनादेखि निर्माण थालिएको ५६७ मिटर लामो झोलुंगे पुलको भौतिक प्रगति अन्तिम चरणमा पुगेको ठेकेदार कम्पनी थानी÷बीएलटी÷हिमशिखर कन्स्ट्रक्शनले बताएको छ ।
पुलको मुख्य संरचनाको काम सम्पन्न भइसकेको र लठ्ठा तानेर फिटिङ गर्न मात्र बाँकी रहेको कम्पनीका प्रतिनिधि नरहरि खड्काले जानकारी दिनुभयो । कालीगण्डकी माथी यो पुल निर्माणको काम भैरहेको छ । २०५९ सालदेखि सम्भाव्यता अध्ययन थालिए पनि लामो पुलका लागि लठ्ठा तान्ने प्रविधि नभएकाले तत्काल काम शुरू हुन सकेको थिएन । पछि सरकारले लठ्ठा तान्ने प्रविधि खरीद गर्ने र २०७७ असारभित्र सम्पन्न गर्ने लक्ष्यसहित निर्माण थालिएको थियो ।
सस्पेन्सन पुल विभाग मार्फत भएको खुला बोलपत्र प्रक्रियाबाट निर्माणको जिम्मेवारी थानीरबीएलटीरहिमशिखर जेभी निर्माण कम्पनीले ६ करोड ९१ लाख रुपैयाँमा ठेक्का सम्झौता गरेको हो । १३० मिटर उचाइमा रहेको यो पुलको लठ्ठा तान्न कठिनाइ भइरहेको खड्काले बताउनुभयो । दुवै जिल्लातर्फ रहेका विद्युत्का तार र मध्यपहाडी लोकमार्गको मालढुंगा–बागलुङ खण्ड एवं मालढुंगा–बेनी सडकमा सवारी आवतजावत गरिरहने हुनाले समस्या भएको छ ।
बांगेचौरदेखि पाङसम्म तुइन बनाएर लठ्ठा तान्ने योजना निर्माण कम्पनीको भए पनि लठ्ठा खस्न सक्ने भन्दै विद्युत्को तार व्यवस्थापनका लागि पहल भइरहेको बताइएको छ । पर्वत र बागलुङका विद्युत् तार व्यवस्थापन भएमा ३ महीनाभित्र सबै काम सकिने दाबी कम्पनीले दाबी गरेको छ ।