चैत्र ७, पर्वत ।  हिंसामा परेका र आश्रयविहीन महिला–बालबालिका राख्न सरकारी स्तरबाट निर्माण थालिएको सुरक्षित घर (सेफ हाउस) अलपत्र परेको छ । डेढ करोड लागत अनुमानसहित चार ४ वर्षअघि थालिएको काम अहिले ठप्प छ । तत्कालीन प्रहरी नायब उपरीक्षक गंगा पन्तको अगुवाइमा ०७३ असारमा कुस्मा–५ बडागाउँस्थित कारागारनजिकै ८ आनामा सेफ हाउस निर्माण थालिएको थियो । उक्त जग्गा तत्कालीन महिला तथा बालबालिका कार्यालयको नाममा छ । साढे २ तलाको १८ कोठे भवन एक वर्ष्भित्रै बनाउन कुस्मा नगरपालिकाका प्राविधिकले करिब डेढ करोडको स्टिमेट गरेका थिए ।

भवन बनाउन जिल्ला विकास समिति, नगरपालिका, संविधानसभा सदस्य, राजनीतिक दलका नेता, सामाजिक अगुवा निकै सक्रिय थिए । तर जग खन्ने, पिलर उठाउने र दोहोरो बिम बाँधेर टाइपिङ गरिएपछि काम रोकिएको छ । निर्माण थाल्नुअघि बोलकबोल गरेका सरकारी निकायबाट रकम नपाएपछि काम रोकिएको निर्माण समितिका पदाधिकारीको दाबी छ । भुइँतला प्लास्टर गरेर छाडिएको भवन अहिले झाडीले ढाकेको छ ।