चैत २३ पर्वत । पर्वत र बागलुङमा किसानलाई बाली लगाउन आवश्यक मल वितरण गरिएको छ । कृषि ज्ञान केन्द्र पर्वतले किसानलाई मल वितरण गरिरहेको जानकारी दिएको छ । किसानहरु अहिले हिउँदे मकै लगाउने चटारोमा छन् भने चैतेधान रोप्ने क्रम पनि चलिरहेको छ । किसानलाई बाली लगाउने बेला मलको अभाव हुन नदिइएको कृषि ज्ञान केन्द्र प्रमुख बासुदेव रेग्मीले जानकारी दिनुभयो ।

लकडाउनका कारण किसानलाई मलको अभाव हुन नदिन कृषि सामाग्री कम्पनी लिमिटेडमा स्टक रहेको मल वितरण भैरहेको रेग्मीले बताउनुभयो । केन्द्रमा डिएपी, यूरिया र पोटास लगायत मल तथा अन्य किटनाशक औषधीहरु समेत पर्याप्त मात्रामा रहेको छ । पर्वत र बागलुङका कृषकहरुलाई माग अनुसार मल उपलब्ध गराईरहेको केन्द्र प्रमुख रेग्मीले बताउनुभयो । रासायनिक मल आवश्यक परेका सम्पकृ गर्न कृषि सहकारी तथा समुहहरुलाई सम्पर्क गर्न आग्रह गरिएको छ ।

पर्वत र बागलुङ दुई जिल्लाको लागि कृषि सामाग्री संस्थान पर्वतले वर्षेनी रासायनिक मल उपलव्ध गराउँदै आएको कार्यालय प्रमुख नारायण शर्माले जानकारी दिनुभयो । सरकारले नै परिवारका सदस्यहरु मिलेर सामाजिक दुरी कायम गरी कृषि क्षेत्रमा काम गर्न आग्रह गरेको छ । यतिवेला गाउँमा मकै गोड्न, छर्न, चैते धान रोप्न तथा विभिन्न तरकारीहरु लगाउन कृषकहरुलाई भ्याईनभ्याई छ ।