चैत्र २९, पर्वत । पर्वतको जिल्ला अस्पतालबाहेक अन्य ग्रामीण क्षेत्रका स्वास्थ्य संस्थामा कोरोनाको त्रासका कारण स्वास्थयकर्मीहरुलाई बिरामीहरुको उपचारमा समस्या भएको छ । जिल्लामा २ वटा प्राथमिक स्वास्थ्य केन्द्र र ५२ वटा स्वास्थ्यचौकीमा सबैभन्दा समस्या ज्वरोका बिरामी जाँच्न हुने गरेको स्वास्थ्यकर्मीहरु बताउँछन् । थर्मल गनको अभावले ज्वरोका विरामी जाँच्न समस्या भएको स्वास्थ्यकर्मीहरु बताउँछन् ।

थर्मल गन नहुँदा डिजिटल थर्मामिटर नै प्रयोग गर्दै आएको खौलालाँकुरी स्वास्थ्यचौकीका ईन्चार्ज श्यामकुमार यादवले बताउनुभयो । कोरोनाको लक्षण संग मिल्दोजुल्दो लक्षण भएका बिरामीहरुलाई जाँच र उपचार गर्दा समस्या भएको यादवले बताउनुभयो । ग्रामीण क्षेत्रका स्वास्थ्यचौकीहरुमा मास्क, ग्लोब्स, गगल्स, बुट लगायतका सामाग्रीहरु पनि प्रर्याप्त छैनन् ।

यसैबीच पर्वतका ६६ जनाको नमूना संकलन गर्दा ५० जनामा कोरोना नभएको पुष्टि भएको छ । १६ जनाको रिपोर्ट आउन बाँकी रहेको छ । बिदेशबाट फर्किएकाहरुको स्वाव परीक्षण भैरहेको छ । कुश्मा नगरपालिका र फलेवास नगरपालिका सहित जलजला र मोदी गाउँपालिकाका ५० जनाको स्वाब संकलन गरी परीक्षणका लागि पठाईएको थियो ।