चैत्र २९, पर्वत । जिल्ला प्रशासन कार्यालय पर्वतले विशेष व्यवस्था गरेर जिल्लामा संचालित विकास आयोजना तथा उद्योगहरु संचालनमा ल्याउने प्रबन्ध गरेको छ । जिल्ला प्रशासन कार्यालय पर्वतको आज बसेको बैठकले जिल्लामा संचालित ठुला विकासे आयोजना तथा उद्योगहरु लकडाउनको समयमा समेत काम गर्न सक्ने गरी विशेष व्यवस्था गरेको हो । 

विश्वव्यापी महामारीको रुपमा फैलिएको कोरोना भाइरस -कोभिड–१९_ को रोकथाम तथा नियन्त्रणका लागि जिल्लामा संचालित आयोजनाहरु बन्द गरिएको थियो । प्रशासनले लकडाउन अवधीमा औषधी र खाद्यान्नका पसल मात्र संचालनमा ल्याएको थियो । जिल्ला प्रशासन कार्यालयले आज विकास निर्माण आयोजनाहरु, दैनिक अत्यावश्यक उपभोगका खाद्यवस्तु, उत्पादन गर्ने उद्योगहरु, चिनी तथा चिया, पशुपन्छप्को दाना उत्पादन गर्ने उद्योगहरु र इटाभट्टीहरु संचालनमा ल्याउन लागेको हो ।

प्रशासनले विकासे आयोजना तथा उद्योगहरु संचालन गर्दा विभिन्न उपायहरु अवलम्वन गर्नुपर्ने नियम जारी गरेको छ । प्रशासनले श्रमिक र अन्य जनशक्तिहरु अनिवार्य रुपमा कार्यस्थल भित्रै रहनुपर्ने, आवास खानाको व्यवस्था कार्यस्थल भित्र गर्नुपर्ने, कार्यस्थलवाट बाहिर जान र कार्यस्थल बाहिर रहेका परिवारका सदस्य लगायत कुनै पनि व्यक्तिहरु सँग सम्पर्कमा आउन नदिन निर्देशन दिएको छ ।  त्यस्तै कार्यस्थलमा व्यक्ति व्यक्तिवीच न्यूनतम भौतिक दुरी कायम गर्नुपर्ने मापदण्ड तोकेको छ ।

स्थास्थ्य तथा जनसंख्या मन्त्रालयले जारी गरेको स्वास्थ्य सम्वन्धी प्रोटोकलन पालन गर्ने, श्रमिक लगायत कार्यस्थलमा रहने सवैको दैनिक ज्वरो नाप्ने, नियमित स्वास्थ्य जाँच गर्ने, मास्क, सेनिटाइजर तथा साबुन पानीको प्रयोग गर्न र एम्बलेन्स स्ट्याण्ड वाई राख्न भनिएको छ । जिल्ला प्रशासनले तोकेको मापदण्ड भित्र रहेर काम गरे नगरेको प्रदेश सरकार, स्थनीय प्रशासन र स्थानीय तहबाट अनुगमन गरि आवश्यक कार्वाही गरिने प्रशासनले जनाएको छ ।