बैशाख ५, पर्वत । लकडाउनका कारण समस्यामा परेर घर फर्किँदै गरेका पैदल यात्रुलाई खाने र पिउने पानीको व्यवस्था गर्न सरोकारवालाहरुले माग गरेका छन् । प्रसासनले रोक्दारोक्दै पनि घर भेटाउन फर्र्किरहेकाहरुको अवस्था दयनिय रहेको हुनाले स्थानीय सरकारहरुलाई खाना र पानीको व्यवस्था गर्नुपर्ने माग गर्न थालिएको हो ।

कोरोना संक्रमण फैलिन नपाओस भनेर सरकारले लकडाउन घोषणा गरि सर्वसाधारणहरुलाई जो जहाँ छ त्यहि रोकिन भनेको छ । तर, कार्यस्थलमा भएका मजदूरहरु खर्च सकिएपछि घरमै फर्किरहेका छन् । पर्वत, वागलुङ , म्याग्दी लगायतका जिल्ला घर भई काठमाण्डौँ, धादीङ, तनहुँ, लमजुङ, कास्की जिल्लामा मजदूरी गर्दै आएकाहरु धमाधम घर फर्किएका छन् ।

नाकाहरुमा प्रहरी राखेर प्रबेश रोक लगाएपछि बनजंगल, खोलाखोल्सी र चोरबाटो बाट मानिसहरु जिल्ला प्रबेश गरिरहेका छन् । उनीहरुलाई लामो दुरीबाट फर्किँदा भोकभोकै र तिर्खा सहँदै हिँडिरहेका छन् । घर फर्किनेहरुको पीडा सरकारले सम्बोधन गर्न सकिरहेको छैन । बाध्यताले घर फर्किनेहरुलाई सडकमा चाउचाउ, विस्कुट, पानी लगायतका खानेकुरा वितरण गर्न सके राहात हुने भएकाले नागरिक समाजले मानवियता देखाउन अनुरोध गर्न थालेका छन् । यहाँका स्थानीय सरकारलाई पैदलयात्रुहरुको समस्या सुन्न अनुरोध गरिएको छ ।

नेकपाका कुश्मा नगर अध्यक्ष शंकर गिरीले स्थानीय सरकारलाई पैदलयात्रुहरुलाई पनि राहातको रुपमा खाना र पानीको व्यवस्था गर्न माग गर्नुभयो । जिल्ला प्रसासन कार्यालयले भने जिल्ला प्रबेशमा कडाई गर्दै आईरहेको छ । पैदल वा लुकीछिपी सवारीमा चढेर आउनेलाई शुरु बिन्दुमा फर्काउने जनाएको छ । सडकमा सास्ती भोग्दै घर फर्किनेहरु सरकार आफुहरु प्रति अनुदार बनेको भन्दै दुखेसो गर्दै आएका छन् । राजमार्गमा प्रहरीको उपस्थिती भएकाले भित्री बाटो हुँदै घर फर्किनेहरुको लर्को लाग्दै आएको छ ।