बैशाख १७, पर्वत । बालबालिकालाई लगाईने गरेको नियमित खोप कार्यक्र पर्वतका स्थानीय तहमा पुनः सुचारु भएको छ । कोरोना भाईरसको त्रासका कारण रोकिएको खोप लगाउने कार्यक्रम जिल्लाका सबैजसो स्थानीय तहमा शुरु भएको स्वास्थ्य संयोजकहरुले जानकारी दिएका छन् ।

 कुश्मा नगरपालिकाका ग्रामीण क्षेत्रका सबै क्षेत्रमा लकडाउन अघि नै खोप लगाएर सक्किएपनि बजार क्षेत्रमा बाँकि थियो । बाँकि रहेका बालबालिकालाई खोप लगाउने अभियान विगत ४ दिन अगाडी देखि पुनः शुरु भएको कुश्मा नगरपालिकाका स्वास्थ्य सह संयोजक यामप्रसाद शर्माले जानकारी दिनुभयो । जन्मेदेखि २ वर्ष भित्रका बालबालिकालाई खोप लगाउने गरिएको छ ।

मोदी गाउँपालिकाका स्वास्थ्य संयोजक उमेश अधिकारीले बालबालिकालाई विभिन्न रोग लाग्नबाट सुरक्षित बनाउने गरी बनाईएका यस्ता खोपहरु अहिलेको भाइरससँग जुध्नका निम्ति पनि अत्यावश्यक रहेको बताउनुभयो । यो खोप विभिन्न ११ प्रकारका रोगका बिरुद्ध लगाईन्छ । मोदी गाउँपालिकामा पनि अभियान शुरु भएको अधिकारीले जानकारी दिनुभयो । २८० जनाले खोप लगाईसकिएको र २० जना गर्भवतीले टिटि खोप लगाउनुभएको छ । पर्वत जिल्लाभर नियमित खोप लगाउने बालबालिकाको संख्या १२ हजार भन्दा बढि छ ।

फलेवास नगरपालिकामा पनि खोप कार्यक्रम शुरु भएको स्वास्थ्य संयोजक रुद्रप्रसाद शर्माले जानकारी दिनुभयो । पिपिई लगाएर स्वास्स्थ्यकर्मीले खोप लगाउन शुरु गरेको शर्माले बताउनुभयो । जिल्लामा १५९ खोप केन्द्रमा नियमित खोप लगाउने गरिएको छ ।