विशन क्षेत्री

सशस्त्र प्रहरी बल चण्डिकागणमा मल्याङ्गदीखोलाको पानी ल्याईने भएको छ । खानेपानीको समस्यामा रहेको सशस्त्रमा मल्याङ्दीखोला स्थित नाकेदहदेखी खानेपानी ल्याउने गरि सम्झौता भएको हो ।

स्थानीय राजनीतिक दल, उपभोक्ता समिति र शसस्त्र प्रहरीको सम्झौतामार्फत जिल्ला खानेपानी तथा सरसफाई डिभिजन कार्यालयको समन्वयमा खानेपानी ल्याईने भएको हो । त्यसका लागि मल्याङ्गदी सिँचाई योजना मुडिकुवा गाविसकाका सचिव लिलाधर गौँडेलले शसस्त्र प्रहरी बललाई बिना रोकतोक खानेपानी उपलब्ध गराउने सम्बन्धमा गरिएको सम्झौतामा हस्ताक्षर गरेका छन् ।

यसअघि एक महिनादेखी खानेपानी ल्याउने बारेमा दुईपक्षका बिचमा छलफल भएको थियो । मल्याङ्दीखोला प्रभावित क्षेत्रका बासिन्दाले अन्तत १ ईन्च पानी दिन सकारात्मक भएपछि ससत्र प्रहरी बल चण्डिका गणमा खानेपानी ल्याउने योजना सफल हुने भएको हो ।

शसस्त्र प्रहरी वल चण्डिका गणका डिएसपी हर्कराज पन्तले दोहोरो सम्झौतामा खडेरी परेको खण्डमा र किसानलाई बिउ राख्ने समयमा स्थानीयलाई पानी दिने गरि सम्झौता भएको पनि उल्लेख गरे । जिल्ला खानेपानी तथा सरसफाई डिभिजन कार्यालयले एक हप्ताभित्रमा सशस्त्रमा पानी ल्याउने योजनास्वरुप काम सुरु गरिसकेको कार्यालय प्रमुख प्रेम प्रसाद डोटेलले जानकारी दिए ।

बडागाउँमा शसस्त्र प्रहरीको गण स्थापना भएदेखी नै चुवा स्थित बडरे खोलावाट पानी ल्याएर प्रयोग गर्दै आइरहेको छ । उक्त योजनाको सम्झौता बैशाख ५ गते सकिएको थियो । करिव ७ सयको संख्यामा जनशक्ति रहेको चण्डिका गणलाई अहिले खानेपानीको समस्या रहेको छ ।