पुष १९ पर्वत-

पर्वतको वर्राचौर र रानीपानीका वासिन्दाको खानेपानीको समस्या समाधान हुने भएको छ । लिसेगेरा खानेपानी आयोजना शुरु भएदेखि वर्षौको खानेपानीको समस्या समाधान हुने भएको हो । विगत देखि खानेपानीको समस्याले पिरोलिएको स्थानीयवासीहरुको मागलाई सम्वोधन गर्दै बिहादी गाउँपालीका २ बर्राचौर र ३ रानीपानीमा उक्त आयोजना शुरु भएको हो ।

एक घर एक धारा पुराउने अवधारणा अनुसार गत सोमवारवाट आयोजनाको काम शुरु भएको छ । एक वर्षभित्रै आयोजनाको काम पुरा गर्ने लक्ष्य रहेको छ । खानेपानी आयोजनाकोे शिलान्यास गर्दै बिहादी गाँउपालीकाका अध्यक्ष कमल प्रसाद भुसालले बिहादी गाँउपालीका साबिक बर्राचौर र रानीपानी बडाका बासिन्दालहरु अवका दिनमा खानेपानीबाट बञ्चीत हुनुपर्ने अवस्थाको अन्तय हुने बताउनुभयो ।

भुसालले गुणस्तरियतामा विशेष ध्यान दिन आग्रह गर्नुभयो । खानेपानीको समस्या समाधान गर्न गाउँपालिकाले ध्यान दिँदै आयोजनाको दिगोपन र छिटो काम सक्न निगरानी गर्ने वताउनुभयो । उक्त खानेपानी आयोजनाले दुई वडाका करिव ५ सय भन्दा वढि परिवार लाभान्वित हुने जनाइएको छ ।